Sirdaryoda sobiq murabbiyi shilqimlik qilgan qizga tayinlangan jarima bekor qilindi

Sirdaryo viloyati Sayxunobod tumanida sobiq murabbiyi tomonidan jinsiy shilqimlikka uchragan 18 yoshli qizga mayda bezorilik uchun tayinlangan ma’muriy jarima apellyatsiya instansiyasi tomonidan bekor qilindi. Bu haqda Sirdaryo viloyati sudlari xabar berdi.

 

Sud hujjatlariga ko‘ra, voqea 2026-yil 17-iyul kuni Sayxunobod tumanidagi "Shodlik" mahallasida joylashgan xiyobonda sodir bo‘lgan. Sport maktabida murabbiy bo‘lib ishlovchi S.X. avval o‘ziga shogird bo‘lgan qizni uchratib, unga jinsiy aloqa taklif qilgan va shahvoniy shilqimlik qilgan. Qizning bundan jahli chiqqan, S.X bilan janjallashib, baqir-chaqir qilgan.

 

Sayxunobod tuman sudi S.X.ni Ma’muriy javobgarlik to‘g‘risidagi kodeksning 41-1-moddasi (shahvoniy shilqimlik) bilan aybdor deb topib, unga nisbatan 5 sutka ma’muriy qamoq jazosi tayinlagan.

 

Shu bilan birga, qiz xiyobonda baqir-chaqir qilgani uchun Ma’muriy javobgarlik to‘g‘risidagi kodeksning 183-moddasi (mayda bezorilik) bilan aybdor deb topilib, unga bazaviy hisoblash miqdorining uch baravari — 1 mln 236 ming so‘m miqdorida jarima belgilangan edi.

 

Keyinchalik mazkur qaror ustidan berilgan shikoyat Sirdaryo viloyat sudining apellyatsiya instansiyasida ko‘rib chiqildi. Sud birinchi instansiya qarorini qizga nisbatan bekor qildi.

 

Apellyatsiya instansiyasi qarorida qayd etilishicha, qizning harakatlarida ma’muriy huquqbuzarlik hodisasi mavjud emas. Shu sababli unga oid ma’muriy ish Ma’muriy javobgarlik to‘g‘risidagi kodeksning 271-moddasi 1-qismi asosida tugatildi.

 

Shuningdek, viloyat sudi ma’muriy ish bo‘yicha surishtiruv harakatlarini olib borgan ichki ishlar organi profilaktika inspektori hamda ishni ko‘rgan Sayxunobod tuman sudining tergov sudyasiga nisbatan tegishli taqdimnomalar kiritdi.