Farg‘onada “Mansur Kazanskiy” laqabli shaxs tovlamachilikda gumonlanib ushlandi

Farg‘ona viloyatida “Mansur Kazanskiy” laqabi bilan tanilgan, uyushgan jinoyatchilikka aloqador shaxs tovlamachilikda gumonlanib ushlandi. Bu haqda Farg‘ona viloyati IIB axborot xizmati ma’lum qildi.

 

Ma’lum qilinishicha, Aripov Mansur Fozilovich Toshkent shahrida yashovchi fuqaroga tegishli noturar joyni 1,2 mln dollarga sotib olishga kelishgan. Hisob-kitobni obyektni garovga qo‘yish orqali bank krediti hisobidan amalga oshirish rejalashtirilgan.

 

Obyekt notarial tartibda Aripov nomiga rasmiylashtirilganidan so‘ng, u kreditning oylik to‘lovlari va foizlari bilan tanishib, qarz olishdan bosh tortgan. Shundan keyin esa noturar joyni asl egasiga qaytarish o‘rniga, uni jabrlanuvchi nomiga qayta rasmiylashtirib berish evaziga 200 ming dollar talab qilgani aytilmoqda.

 

Bundan tashqari, Aripov 1968-yilda tug‘ilgan sherigi bilan birga jabrlanuvchining tadbirkor hamkoriga bosim o‘tkazib, uni qoralovchi materiallar to‘plangani va jinoiy javobgarlikka tortilishi bilan qo‘rqitgan hamda undan pul talab qilgan.

 

Farg‘ona viloyati IIB va DXX xodimlari hamkorligida o‘tkazilgan tezkor tadbir davomida gumonlanuvchi Farg‘ona shahridagi Burhoniddin Marg‘inoniy ko‘chasida joylashgan notarial idorada noturar binoni jabrlanuvchiga qayta rasmiylashtirib berish evaziga 100 ming dollar olayotgan vaqtida ashyoviy dalillar bilan ushlandi.

 

Holat yuzasidan Jinoyat kodeksining 165-moddasi (tovlamachilik) bilan jinoyat ishi qo‘zg‘atilgan. Jinoyatga aloqador shaxslar protsessual tartibda ushlangan.

 

Huquq-tartibot organlari mazkur shaxslarning noqonuniy xatti-harakatlaridan jabr ko‘rgan fuqarolar bo‘lsa, 102 raqamiga qo‘ng‘iroq qilib xabar berishlarini so‘ragan.