Toshkentda 3 yoshli o‘g‘liga zo‘ravonlik qilgan ona ustidan jinoyat ishi qo‘zg‘atildi
U o‘g‘liga uxlatuvchi dori berib, uni qarovsiz qoldirib kelgani aniqlandi.
Toshkentda 3 yoshli bolaga nisbatan zo‘ravonlik qilingani yuzasidan jinoyat ishi qo‘zg‘atildi. Bu haqda Bolalar ombudsmani xabar berdi.
Ma’lum qilinishicha, Yashnobod tumanida yashovchi bir guruh fuqarolar tomonidan Bolalar ombudsmani kotibiyatiga voyaga yetmagan bolaga nisbatan zo‘ravonlik qilinayotgani haqida murojaat kelib tushgan.
Murojaatda 1989-yilda tug‘ilgan A.T. ismli ayol 2023-yilda tug‘ilgan o‘g‘li A.I.ga muntazam ravishda jismoniy zo‘ravonlik qilayotgani, shuningdek, unga uxlatuvchi dori vositalarini berib, bolani qarovsiz va parvarishsiz qoldirayotgani bildirilgan.
Bolalar ombudsmanining rasmiy so‘rovi asosida holat Ichki ishlar boshqarmasi hamda Ijtimoiy himoya milliy agentligi tomonidan o‘rganilgan.
O‘rganish natijalariga ko‘ra, bolaga nisbatan muttasil tazyiq va qiynash holatlari yuzasidan Jinoyat kodeksining 110-moddasi (Qiynash) bilan jinoyat ishi qo‘zg‘atilgan. Shuningdek, bolaga nisbatan himoya orderi rasmiylashtirilgan.
Hozirda bolaning sog‘lig‘ini tiklash uchun zarur tibbiy muolajalar ko‘rsatilgan va uning salomatligi barqaror yaxshi holatda ekani ma’lum qilindi.
Tuman vasiylik organi tomonidan bolaning qonuniy manfaatlarini inobatga olgan holda vaqtincha vasiylik ta’minlangan. A.T.ni ota-onalik majburiyatlarini bajarmaganligi sababli onalik huquqidan mahrum qilish bo‘yicha sudga taqdim etiladigan hujjatlar tayyorlanmoqda.
Bolalar ombudsmani bolaning xavfsiz va sog‘lom muhitda yashashini ta’minlash masalasini nazoratida davom ettirishini bildirdi.
