“Hududgaz Qoraqalpog‘iston”da 251,5 mlrd so‘mlik zarar aniqlandi
Holat yuzasidan mansabdorlarga nisbatan jinoyat ishi qo‘zg‘atilgan.
“Hududgaz Qoraqalpog‘iston” gaz ta’minoti filialida tabiiy gaz hisobini yuritish bilan bog‘liq holatda davlat va jamiyat manfaatlariga 251,5 milliard so‘mlik zarar yetkazilgani aniqlandi.
Bosh prokuratura huzuridagi Departamentning Qoraqalpog‘iston Respublikasi boshqarmasi o‘tkazgan tergovga qadar tekshiruvda filial mas’ul xodimlari tomonidan qabul qilib olingan va iste’molchilarga yetkazib berilgan tabiiy gaz hajmi o‘rtasidagi tafovutning sabablari aniqlanmagani ma’lum bo‘lgan.
Ushbu farq hisobotlarda oddiy gaz yo‘qotishi sifatida ko‘rsatilgan. Natijada davlat va jamiyat manfaatlariga 251,5 milliard so‘mlik zarar yetkazilgan.
Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 205-moddasi (hokimiyat yoki mansab vakolatini suiiste’mol qilish) bilan jinoyat ishi qo‘zg‘atilgan.
Hozirda tergov harakatlari olib borilmoqda.
