Uchtepadagi yong‘inda FVV xodimi 7 kishining hayotini qutqarib, o‘zi halok bo‘ldi
Yong‘in 15 avgust kuni “Quyi Darxon” MFY hududidagi xonadonlardan birida sodir bo‘lgan.
Toshkentning Uchtepa tumanida sodir bo‘lgan yong‘inda FVV Maxsus qutqaruv batalyoni guruh komandiri, kapitan Boburmirzo Pardayev yonayotgan uydan 7 kishini olib chiqib, ularning hayotini saqlab qoldi. Biroq qutqaruv ishlari vaqtida u halok bo‘ldi.
Yong‘in 15 avgust kuni soat 03:41 da Uchtepa tumani “Quyi Darxon” MFY hududidagi xonadonlardan birida sodir bo‘lgan. Bu haqda “112” tizimi orqali Toshkent shahar Favqulodda vaziyatlar boshqarmasiga xabar kelib tushgan.
Qutqaruvchilar voqea joyiga yetib kelib, yong‘inni o‘chirish bilan birga, uyda bo‘lgan aholini xavfsiz hududga olib chiqishni boshlagan.
Kapitan Boburmirzo Pardayev ham qutqaruv ishlarida faol qatnashib, shaxsan 7 kishini yonayotgan uydan olib chiqqan. Biroq yong‘inni bartaraf etish vaqtida tom qismi to‘satdan qulab tushgan va qutqaruvchi halok bo‘lgan.
Favqulodda vaziyatlar vazirligi rahbariyati va shaxsiy tarkibi marhum qutqaruvchining oila a’zolari va yaqinlariga hamdardlik bildirgan.
