Quvada erkak oilaviy mojaro sabab qaynotasining uyiga o‘t qo‘ydi
Yong‘in oqibatida xonadonga 109,8 million so‘mlik zarar yetgan, sudlanuvchi zararni to‘liq qoplagani inobatga olinib, unga 3 yilga axloq tuzatish ishlari jazosi tayinlandi.
Farg‘ona viloyati Quva tumanida erkak oilaviy mojaro sabab qaynotasining xonadoniga o‘t qo‘ygan. Hodisa oqibatida 109,8 million so‘mdan ortiq zarar yetkazilgan.
“Zamon” informatsion dasturida ma’lum qilinishicha, erkakning xotini farzandini olib, ota uyiga ketgan. Rossiyadan qaytgan erkak farzandini ko‘rish maqsadida qaynotasining uyiga borgan. Biroq u yerda qaynonasining qizi boshqa kishiga turmushga berilgani haqidagi gapdan jahli chiqqan.
Oradan bir necha soat o‘tib, erkak qo‘lida benzin bilan yana qaynotasining xonadoniga kelgan. U yonilg‘ini uydagi xonalardan biriga sepib, o‘t qo‘ygan va voqea joyidan ketgan. Yong‘in natijasida 109 million 884 ming so‘mlik moddiy zarar yetkazilgan.
Sud majlisida sudlanuvchi aybiga to‘liq iqror bo‘lgan. U qilmishini jahl ustida sodir etganini bildirib, pushaymonligini aytgan. Jabrlanuvchi esa yetkazilgan zarar to‘liq qoplanganini va sudlanuvchiga nisbatan da’vosi yo‘qligini ma’lum qilgan.
Sud erkakni Jinoyat kodeksining 173-moddasi ikkinchi qismi “b” bandida nazarda tutilgan jinoyatni sodir etganlikda aybli deb topgan.
Yetkazilgan zarar to‘liq qoplangani hamda jabrlanuvchining da’vosi yo‘qligi inobatga olinib, sudlanuvchiga 3 yil muddatga axloq tuzatish ishlari jazosi tayinlangan.
