Sergelida yangi ko‘prik foydalanishga topshirildi
Ushbu ko‘prik masalasi Prezident Shavkat Mirziyoyev raisligidagi videoselektor yig‘ilishida tanqid qilingandi.
Toshkent shahrining Sergeli tumanida “Junariq” va “Yuqori Darxon” mahallalarini bog‘lovchi yangi ko‘prik foydalanishga topshirildi. Bu haqda poytaxt hokimligi xabar berdi.
Avval mazkur hudud aholisi, jumladan, maktab o‘quvchilari kanalni kesib o‘tishda quvurlardan foydalanib kelgan. Bu esa ular uchun xavf tug‘dirgan.
Ushbu masala 2026-yil mart oyida Prezident Shavkat Mirziyoyev raisligida o‘tkazilgan videoselektor yig‘ilishida tanqid qilingandi.
Prezident “Junariq” kanalidagi ko‘prik masalasi bo‘yicha murojaat ikki oy davomida hal etilmagani va mas’ullar unga yuzaki javob berganini, muammo ijtimoiy tarmoqlarda tarqalgach hal etilganini qayd etgandi.
Uzunligi 28 metr, kengligi 8 metr bo‘lgan yangi ko‘prik 80 tonnagacha yukni ko‘tara oladi. Inshoot orqali kanalning ikki tomonida joylashgan mahallalar va ta’lim muassasalari o‘rtasida xavfsiz qatnov ta’minlanadi.
