“Siyosiy iroda yo‘qligidan hammamiz paxtaga qul edik” — Shavkat Mirziyoyev
Prezident Sirdaryoning agrar hududdan sanoati rivojlangan viloyatga aylanganini qayd etib, O‘zbekistonning paxtaga qaramlikdan chiqish jarayoniga to‘xtaldi.
Prezident Shavkat Mirziyoyev O‘zbekistonda amalga oshirilayotgan islohotlar natijasida mamlakat iqtisodiyoti paxtaga qaramlikdan chiqib, sanoat va xizmat ko‘rsatish sohalari rivojlanayotganini ta’kidladi.
Bu haqda davlat rahbari hududlarda yangi obyektlarni ishga tushirish marosimida so‘zlagan nutqida ma’lum qildi.
Tadbirda Sirdaryo viloyatining so‘nggi yillardagi iqtisodiy rivojlanishi haqida ma’lumot berildi. Viloyat hokimi Erkinjon Turdimovning ta’kidlashicha, 2016-yildan buyon Sirdaryo iqtisodiyoti agrar hududdan sanoati rivojlangan viloyatga aylangan. 2026-yilda hududga 2 milliard dollar investitsiya jalb etish rejalashtirilmoqda.
Prezident Sirdaryoda bunday hajmdagi investitsiyalarni jalb etish imkoniyati avval tasavvur ham qilinmaganini qayd etgan.
Shuningdek, Sirdaryo erkin iqtisodiy zonasida investitsiya samaradorligi oshgani ta’kidlangan. Avval bir gektar yerga o‘rtacha 1 million dollar investitsiya to‘g‘ri kelgan bo‘lsa, hozir bu ko‘rsatkich 3,8 million dollarga yetgan.
Erkinjon Turdimov ta’lim tizimidagi o‘zgarishlarga ham to‘xtalib, maktab o‘quvchilarining paxta yig‘im-terimiga jalb etilmayotganini qayd etgan. Uning so‘zlariga ko‘ra, amalga oshirilayotgan islohotlar O‘zbekistonning paxtaga qaramligini kamaytirib, mamlakat iqtisodiyotini diversifikatsiya qilishga xizmat qilmoqda.
Prezident Shavkat Mirziyoyev esa mamlakatning avvalgi paxtaga qaram holatini esga olib, o‘zbekistonliklar uzoq yillar davomida deyarli butun vaqtini paxta yetishtirish bilan bog‘liq ishlarga sarflaganini ta’kidladi.
“Lekin hamma unutib yubordi u qullikni. Siyosiy iroda yo‘qligidan hammamiz paxtaga qul edik haqiqatdan. 24 soat, 12 oy shudgor, chekanka, defolyatsiya, terim bilan shug‘ullanar edik. Boshqa hech nima bilan shug‘ullanmasdik”, — dedi Prezident.
Davlat rahbari Sirdaryoning bugungi iqtisodiy ko‘rsatkichlari amalga oshirilayotgan islohotlar va yaratilgan imkoniyatlarning natijasi ekanini qayd etdi.
