Toshkentda internet-narkodo‘kon kuratori salkam 10 kg giyohvandlik vositasi bilan ushlandi
Fuqaro avval ham Jinoyat kodeksining ikki moddasi bilan sudlangan.
Toshkentda internet-narkodo‘konida administrator va kurator sifatida faoliyat yuritgan fuqaro qariyb 10 kilogramm giyohvandlik vositalari bilan qo‘lga olindi. Bu haqda Ichki ishlar vazirligi xabar berdi.
Ma’lum qilinishicha, tezkor tadbirlar davomida 1989-yilda Toshkent shahrida tug‘ilgan, muqaddam Jinoyat kodeksining 164 va 278-moddalari bilan sudlangan fuqaro qo‘lga olingan.
Shuningdek, fuqaroning avtomobili va yashash xonadoni ko‘zdan kechirilganda 9 kilogramm 330 gramm gashish va 545 gramm metamfetamin aniqlanib, daliliy ashyo sifatida rasmiylashtirilgan.
IIV ma’lumotiga ko‘ra, olib qo‘yilgan gashish 64 817 dozaga teng.
Holat yuzasidan jinoiy guruhga nisbatan Jinoyat kodeksining 273-moddasi 5-qismi bilan jinoyat ishi qo‘zg‘atilgan. Mazkur modda bo‘yicha 20-yilgacha ozodlikdan mahrum qilish jazosi belgilanishi mumkin.
