Daniya ilk bor Grenlandiyaga muddatli harbiy xizmatchilarni yubordi
Daniyaning Arktikadagi harbiy ishtirokini kuchaytirish qarori AQSHning Grenlandiyaga da’volari fonida amalga oshirilmoqda.
Daniya Arktikadagi harbiy mavjudligini kuchaytirish doirasida ilk bor muddatli harbiy xizmatchilarini Grenlandiyaga yubordi. Bu haqda Reuters xabar berdi.
Mazkur qaror AQSH prezidenti Donald Trampning Daniyaga qarashli yarim avtonom Grenlandiyani AQSH tasarrufiga o‘tkazish haqidagi bir necha bor bildirgan istaklari fonida qabul qilingan. Kopengagen va Grenlandiya hukumati bu g‘oyani qat’iyan rad etgan.
Grenlandiyaga yuborilgan harbiy xizmatchilar Daniyaning harbiy xizmat muddatini uzaytirish bo‘yicha yangi dasturining ilk guruhiga kiradi. Ular Arktikaning og‘ir iqlim sharoitida jangovar harakatlar olib borish va omon qolish bo‘yicha tayyorgarlikdan o‘tmoqda.
Harbiy xizmatchilar «Arctic Endurance» mashg‘ulotlarida ishtirok etmoqda. Ushbu mashg‘ulotlar NATOning Arktikadagi mavjudligini kuchaytirishga qaratilgan «Arctic Sentry» missiyasi doirasida o‘tkazilmoqda.
Daniya hukumati Arktikadagi mudofaani kuchaytirish uchun milliardlab dollar mablag‘ ajratishni rejalashtirgan. Mamlakat mudofaa vaziri mintaqaga yillar davomida yetarlicha sarmoya kiritilmaganini tan olgan.
Ayni paytda Rossiya NATOning Arktikadagi faolligi kuchayishidan xavotir bildirgan va buni bevosita xavfsizlik tahdidi deb baholagan. Xitoy ham mintaqadagi, xususan foydali qazilmalarga boy hududlardagi faoliyatini kengaytirmoqda.
