Putin Trampning maxsus vakillari bilan Ukrainadagi urushni tugatish masalasini muhokama qildi
Biroq uchrashuv yakunida kelishuvga erishilgani yoki sezilarli siljish bo‘lgani haqida ma’lumot berilmadi.
Rossiya prezidenti Vladimir Putin AQSh prezidenti Donald Trampning maxsus vakillari Stiv Uitkoff va Jared Kushner bilan Moskvada Ukrainadagi urushni tugatish masalasini muhokama qildi. Uchrashuv uch soatdan ortiq davom etdi.
Rossiya prezidenti yordamchisi Yuriy Ushakovning aytishicha, AQSh vakillari mojaroni hal qilishning ehtimoliy yo‘llari bo‘yicha bir qator takliflarni bildirdi. Biroq u takliflarning mazmunini ochiqlamagan.
Putin esa Rossiya jang maydonida «real taraqqiyot»ga erishayotganini va urushdagi maqsadlariga erishishiga ishonch bildirdi. Uning ta’kidlashicha, mojaroni hal qilish uchun uning «barcha tub sabablarini» bartaraf etish zarur.
Ushakovning ma’lum qilishicha, muzokaralarda Ukrainadagi vaziyatdan tashqari iqtisodiy masalalar hamda Rossiya va AQSh o‘rtasidagi ehtimoliy yirik loyihalar muhokama qilingan. Uchrashuvni Rossiya tomoni «o‘z vaqtida o‘tkazilgan va har ikki tomon uchun juda foydali» deb baholadi.
Oq uy vakili ham muzokaralarni «mazmunli» deb atadi. Uning so‘zlariga ko‘ra, keyingi qadamlar yaqin haftalarda e’lon qilinadi.
Uitkoff va Kushner muzokaralardan so‘ng Moskvadan Kiyevga yo‘l olgan. Ular yakshanba kuni Ukraina prezidenti Volodimir Zelenskiy bilan uchrashishi kutilmoqda.
Ayni paytda Rossiya va Ukraina urushni tugatish shartlari bo‘yicha hamon keskin farq qiluvchi pozitsiyalarda qolmoqda. Moskva Ukraina Rossiya da’vo qilayotgan to‘rt viloyat hududini to‘liq topshirishi va NATOga qo‘shilish rejasidan voz kechishini talab qilmoqda. Kiyev esa hududlarni Rossiyaga berishdan bosh tortmoqda.
