Indoneziyada vulqon otilishi sabab 8 ta aeroport yopildi
Vulqon kullari tarqalishi oqibatida Jakarta va Bali aeroportlarida aviaqatnovlar cheklanib, ayrim reyslar bekor qilindi.
Indoneziyada Anak Krakatau vulqonining faollashishi oqibatida vulqon kullari tarqalib, mamlakatdagi 8 ta aeroport faoliyatiga cheklovlar joriy etildi. Bu haqda mamlakat Transport vazirligi ma’lum qildi.
Xususan, Jakarta yaqinidagi Soekarno-Hatta xalqaro aeroporti va Bali orolidagi Ngurah Rai xalqaro aeroporti faoliyatida uzilishlar kuzatilmoqda. Ayrim hududlarda reyslar kechiktirilgan yoki bekor qilingan.
Anak Krakatau vulqoni iyul oyi boshidan buyon faol bo‘lib, 4-sentyabr kuni uning faolligi sezilarli darajada kuchaygan. Vulqon otilishi natijasida hosil bo‘lgan kul mamlakatning bir qator hududlariga, jumladan, Jakarta va uning atrofidagi hududlarga tarqalgan.
Rasmiylar aholini vulqon kullaridan himoyalanish choralarini ko‘rishga, tashqariga chiqqanda niqob taqishga hamda uy va xonalarning deraza, eshik va shamollatish teshiklarini yopiq saqlashga chaqirgan.
Shuningdek, vulqon faolligi sabab masofaviy ta’limga o‘tkazilgan ayrim maktablarda bepul maktab ovqatlarini yetkazib berish vaqtincha to‘xtatilishi ma’lum qilingan.
Hozircha vulqon otilishi oqibatida jabrlanganlar haqida ma’lumot yo‘q. Vaziyat tegishli xizmatlar tomonidan kuzatib borilmoqda.
