Serbiyada Shavkat Mirziyoyevni rasmiy kutib olish marosimi bo‘lib o‘tdi
Marosimdan so'ng ikki davlat rahbarlari oliy darajadagi muzokaralarni boshladi.
Belgrad shahridagi Serbiya saroyida Serbiya Respublikasiga rasmiy tashrif bilan borgan Prezident Shavkat Mirziyoyevni tantanali kutib olish marosimi bo‘lib o‘tdi.
Serbiya Prezidenti Aleksandr Vuchich O‘zbekiston davlat rahbarini samimiy kutib oldi.
Oliy martabali mehmon sharafiga faxriy qorovul saf tortdi. Harbiy orkestr ijrosida O‘zbekiston va Serbiya davlat madhiyalari yangradi. Shuningdek, artilleriya to‘plaridan 10 marta o‘q uzilib, tantanali salyut berildi.
Davlat rahbarlari faxriy qorovul safi oldidan o‘tib, rasmiy delegatsiyalar a’zolari bilan salomlashdilar va birgalikda suratga tushdilar.
Shundan so‘ng O‘zbekiston va Serbiya prezidentlari raisligida oliy darajadagi muzokaralar boshlandi.
