Birinchi qavatdagi xonadonlardan savdo va servis uchun foydalanishga ruxsat berilishi mumkin
Bunda xonadonlarni noturar joy toifasiga o‘tkazish shart bo‘lmaydi.
Ko‘p kvartirali uylarning birinchi qavatidagi xonadonlarni noturar joy toifasiga o‘tkazmasdan, ularni savdo va servis faoliyatiga moslashtirishga ruxsat berish taklif qilindi. Bu haqda Prezident Shavkat Mirziyoyev raisligida hududlarda aholi bandligi va daromadlarini oshirish masalalari bo‘yicha o‘tkazilgan kengaytirilgan yig‘ilishda ma’lum qilindi.
Qayd etilishicha, birinchi qavatlardagi xonadonlarda sartaroshxona, go‘zallik saloni, kichik do‘kon, atelye, poyabzal va maishiy texnika ustaxonasi kabi xizmat ko‘rsatish shoxobchalarini tashkil etish mumkin. Biroq buning uchun xonadonni noturar joy toifasiga o‘tkazish talab etilgani tadbirkorlikni boshlashda qo‘shimcha tartib-taomillarni yuzaga keltirmoqda.
Shu sababli xonadon egasi yoki tadbirkorning tegishli faoliyatni boshlagani haqida xabar berishi yetarli bo‘lishi taklif etildi.
Mutasaddilarga bir oy ichida birinchi qavatdagi xonadonlarda yo‘l qo‘yiladigan xizmat turlari va ularga qo‘yiladigan xavfsizlik talablarini belgilash vazifasi topshirildi.
Yig‘ilishda hududlarda foydalanilmayotgan imkoniyatlarni ishga solish orqali yangi ish o‘rinlari yaratish masalasiga ham e’tibor qaratildi. Tuman va mahallalarda bo‘sh yoki to‘liq foydalanilmayotgan bino-inshootlar, shuningdek, ishlab chiqarish va xizmat ko‘rsatish loyihalarini joylashtirish mumkin bo‘lgan yerlar aniqlanib, yangi loyihalarga biriktirilishi kerakligi ta’kidlandi.
Gavjum ko‘chalarda master-rejalar asosida tadbirkorlik obyektlarini joylashtirish, tarixiy shaharlar va turizm mahallalarida ko‘chalarni “eski shahar” uslubida ta’mirlash hamda mehmon uylari, savdo va servis shoxobchalarini ko‘paytirish bo‘yicha vazifalar belgilandi.
Qishloq xo‘jaligida esa eski bog‘lar va qarovsiz yerlarni yangilash orqali har bir gektardan olinadigan daromadni oshirish zarurligi qayd etildi. Bunday choralar yerdan samaraliroq foydalanish va qishloq aholisi uchun qo‘shimcha daromad manbalarini yaratishga xizmat qilishi ko‘zda tutilmoqda.
Shuningdek, ko‘p qavatli uylar atrofidagi bo‘sh hududlarni aniqlash va o‘zboshimchalik bilan egallangan joylarni tartibga keltirish topshirildi. Bu hududlarda bolalar maydonchalari, sport va fitness zonalari, yashil maydonlar tashkil etish hamda ko‘chalarni yoritish vazifalari belgilandi.
