75 ming talaba xavfsizligi ta’minlanadi: Prezident “Yoshlik” shaharchasidagi markazni ko‘rdi

Prezident Shavkat Mirziyoyev Toshkent shahrining Olmazor tumanidagi “Yoshlik” talabalar shaharchasi hokimligida tashkil etilgan vaziyatlar markazi faoliyati bilan tanishdi.

 

 

Raqamli texnologiyalar asosida tashkil etilgan markaz talabalar xavfsizligini ta’minlash, hududdagi ijtimoiy muhitni real vaqt rejimida kuzatish, davomatni nazorat qilish hamda huquqbuzarliklarning oldini olish uchun xizmat qiladi.

 

Vaziyatlar markazi shaharchadagi 41 ta talabalar yotoqxonasini qamrab olgan. Tizim orqali 75 mingga yaqin talaba, shu jumladan, yotoqxonalarda istiqomat qiluvchi 17,5 ming nafar yigit-qizning xavfsizligi ta’minlanadi. Ularning davomatini nazorat qilish va huquqbuzarliklarning oldini olish imkoniyatlari ham mavjud.

 

 

Vaziyatlar markazi 17 ta axborot tizimi bilan integratsiya qilingan. Bu turli ma’lumotlarni yagona raqamli platformada tezkor tahlil qilish va zarur choralarni ko‘rish imkonini beradi.

 

Umumiy maydoni 1 368 kvadrat metr bo‘lgan talabalar shaharchasi hokimligi binosi 2024-yilda qurilgan. Uni mukammal ta’mirlash, vaziyatlar markazini tashkil etish va hududni obodonlashtirish uchun 33 milliard so‘m yo‘naltirilgan.

 

 

Binoda vaziyatlar markazidan tashqari startap xonasi, oliy ta’lim tarixi muzeyi, Yoshlar ishlari agentligining tuman bo‘limi hamda xotin-qizlar tadbirkorligi markazi ham joylashgan.

 

Tashrif davomida Prezidentga markazning ishlash tamoyillari va talabalar shaharchasidagi xavfsizlik hamda ijtimoiy muhitni real vaqt rejimida nazorat qilish imkoniyatlari namoyish etildi.

 

 

Davlat rahbari talabalar bilan tizimli ishlash, ularni qiynayotgan masalalarni tezkor hal etish bo‘yicha tavsiyalar berdi. Vaziyatlar markazi tajribasini mamlakatdagi boshqa talabalar turar joylarida ham joriy etish topshirildi.