BMW‘dagi fojia: YPX inspektorini urib ketib, uning o‘limiga sababchi bo‘lgan o‘quvchi qamaldi
Inspektorning o‘limiga sabab bo‘lgan voyaga yetmagan o‘smirga sud hukmi o‘qildi.
Jinoyat ishlari bo‘yicha Mirobod tuman sudida JKning 104-moddasi 3-qismi “d” bandi — jabrlanuvchining vafotiga sabab bo‘lgan darajada qasddan badanga og‘ir shikast yetkazish bilan bog‘liq jinoyat ishi bo‘yicha sud majlisi yakunlandi. Bu haqda Toshkent shahar sudlari xabar berdi.
Ish yopiq sud majlisida ko‘rib chiqilgan. Sudlanuvchi 2010 yilda tug‘ilgan, xususiy maktabning 10-sinfida tahsil oluvchi voyaga yetmagan shaxs bo‘lgan.
Sud hukmiga ko‘ra, sudlanuvchi JKning mazkur moddasida nazarda tutilgan jinoyatni sodir etishda aybdor deb topilgan. Unga Jinoyat kodeksining 85-moddasi tartibida 2 yil 4 oy muddatga ozodlikdan mahrum qilish jazosi tayinlangan.
Jazo muddatini hisoblash sudlanuvchiga nisbatan “qamoqqa olish” ehtiyot chorasi qo‘llangan 2026-yil 27-fevraldan boshlangan.
Sud yakunida raislik qiluvchi taraflarga hukm mazmunini, jinoyat oqibatida yetkazilgan moddiy va maʼnaviy zararlarni undirish masalasida fuqarolik tartibida sudga murojaat qilish huquqini, shuningdek, sud hukmi ustidan shikoyat qilish muddati va tartibini tushuntirgan.
Eslatib o‘tamiz, 25 -evral kuni soat 21:30 larda 2010-yilda tug‘ilgan D. T. tanishining opasiga tegishli BMVʼni avtomoykadan xodimlarni ogohlantirmasdan olib chiqib ketgan.
U Mirobod tumani Nukus ko‘chasida YPX inspektori, kichik serjant Hosilbek Eshnazarovning to‘xtash haqidagi qonuniy talabiga bo‘ysunmay, uni avtomobil bilan urib yuborgan va voqea joyidan ketgan.
Og‘ir tan jarohati olgan inspektor 27-fevral kuni shifokorlar saʼy-harakatiga qaramay vafot etgan.
