Qozog‘istondagi harbiylar halokati: Mirziyoyev Toqayevga hamdardlik yo‘lladi
O‘zbekiston Prezidenti Kaspiy dengizidagi mashg‘ulotlarda halok bo‘lgan harbiylarning oila a’zolari va yaqinlariga sabr-toqat tiladi.
Shavkat Mirziyoyev Kaspiy dengizi hududida harbiy mashg‘ulotlar vaqtida harbiy xizmatchilar halok bo‘lgani munosabati bilan Qozog‘iston Prezidenti Qasim-Jomart Toqayev va Qozog‘iston xalqiga hamdardlik yo‘lladi.
Davlat rahbari halok bo‘lgan harbiy xizmatchilarning oila a’zolari va yaqinlariga sabr-toqat va bardamlik tiladi.
Eslatib o'tamiz, 24-sentabr kuni Qozog‘istonning Mang‘istov viloyati sohilida o‘tkazilgan dengiz mashg‘ulotlari vaqtida ob-havo keskin yomonlashib, kuchli shamol kuzatilgan. Natijada 17 nafar harbiy xizmatchi dengizga olib chiqib ketilgan.
Qidiruv-qutqaruv ishlari davomida uch nafar harbiy xizmatchi qutqarilgan, 14 nafari esa halok bo‘lgan.
