Shavkat Mirziyoyev Kobaxidzeni tavallud kuni bilan tabrikladi
O‘zbekiston va Gruziya Poti va Anakliya portlari infratuzilmasidan samarali foydalanish orqali transport aloqalarini rivojlantirishni muhokama qildi.
Shavkat Mirziyoyev Gruziya Bosh vaziri Irakliy Kobaxidze bilan telefon orqali muloqot qildi.
Suhbat avvalida davlat rahbari Irakliy Kobaxidzeni tavallud kuni bilan samimiy tabriklab, unga mustahkam sog‘liq, Gruziya xalqiga esa farovonlik va bardavom ravnaq tiladi.
Muloqot davomida O‘zbekiston–Gruziya strategik sheriklik munosabatlarini yanada rivojlantirish masalalari muhokama qilindi.
Xususan, joriy yil 2–3 iyul kunlari O‘zbekiston Prezidentining Gruziyaga davlat tashrifi yakunlari bo‘yicha erishilgan kelishuvlarni amaliy jihatdan ro‘yobga chiqarishga alohida e’tibor qaratildi.
Suhbatda o‘zaro savdo hajmini oshirish, sanoat kooperatsiyasini kengaytirish, shuningdek, Gruziyaning Poti va Anakliya portlari infratuzilmasidan samarali foydalanish orqali transport jihatidan o‘zaro bog‘liqlikni kuchaytirish masalalariga alohida e’tibor qaratildi.
