Shavkat Mirziyoyev Xitoy delegatsiyasini qabul qildi
Tomonlar o‘rtasida infratuzilma, investitsiya va “yashil” sanoat yo‘nalishlaridagi hamkorlikni kengaytirish masalalari ko‘rib chiqildi.
25-sentyabr kuni O‘zbekiston rahbari Xitoy Xalqaro madaniy kommunikatsiya markazi raisi Long Yuysyan va Gonkongning “JDB Group” kompaniyasi asoschisi Chan Xuntoni qabul qildi.
Uchrashuvda O‘zbekiston va Xitoy o‘rtasidagi har tomonlama strategik sheriklikni yanada chuqurlashtirish, shuningdek, madaniy-gumanitar aloqalarni mustahkamlash masalalari muhokama qilindi.
Xitoy Xalqaro madaniy kommunikatsiya markazining mamlakatlar o‘rtasidagi ko‘p qirrali hamkorlikni rivojlantirishga qo‘shayotgan hissasi qayd etildi. Infratuzilmani rivojlantirish, investitsiyalar va “yashil” sanoat yo‘nalishlarida qator qo‘shma loyihalar amalga oshirilgani ta’kidlandi.
Shuningdek, “JDB Group”ning O‘zbekistondagi faoliyatining ustuvor yo‘nalishlari muhokama qilindi. Ular qatoridan zamonaviy shahar, transport va sanoat infratuzilmasini rivojlantirish hamda geologiya sohasi o‘rin olgan.
Uchrashuv yakunida kompaniya ishtirokida amalga oshirilayotgan loyihalarni jadallashtirish va yangi loyihalarni tezroq hayotga tatbiq etish bo‘yicha kelishuvga erishildi.
