Ustyurtda yangi kon: “Qoratau”dan gaz va kondensat olindi
Endilikda kondan sanoat ahamiyatiga ega bo‘lgan tabiiy gaz va kondensat oqimini olish mumkin.
Ustyurt hududining markaziy qismida joylashgan Qoratau maydonida amalga oshirilgan geologiya-qidiruv ishlari natijasida chuqur quyi yura qatlamlarida sanoat ahamiyatiga ega bo‘lgan tabiiy gaz uyumlari aniqlandi. Bu haqda “O‘zbekneftgaz” AJ matbuot xizmati xabar berdi.
Bildirilishicha, Qoratau maydoni maʼmuriy jihatdan Qoraqalpog‘iston Respublikasi Mo‘ynoq tumani hududida joylashgan bo‘lib, maydonda 1-sonli izlov qudug‘i 4860 metr chuqurlikkacha burg‘ilangan.
3-oktyabr kuni sinash ishlari jarayonida quyi yura qatlamlaridan 3273–3213 metr chuqurlik oralig‘idan sanoat ahamiyatiga ega bo‘lgan tabiiy gaz va kondensat oqimi olingan hamda yangi gazkondensatli Qoratau koni ochilishiga erishilgan.
Rejaga muvofiq, joriy yil yakuniga qadar maydonda 2-sonli izlov qudug‘ini burg‘ilashni yakunlash hamda navbatdagi 3- va 4-sonli izlov-qidiruv quduqlarida burg‘ilash ishlarini boshlash rejalashtirilgan.
«Qoratau maydonida erishilgan geologik natija Ustyurt regionida chuqur qatlamlarni o‘rganish bo‘yicha geologiya-qidiruv ishlarining yangi istiqbolli yo‘nalishlarini aniqlash imkonini yaratdi», deyiladi xabarda.
