“Bir safarda bir nechta mamlakat”: Japarov yagona sayyohlik vizasini taklif qildi

 

Qirg‘iziston prezidenti Sadir Japarov Markaziy Osiyo davlatlari va Ozarbayjon uchun yagona sayyohlik vizasini joriy etishni taklif qildi.

 

Japarovning ta’kidlashicha, oltita davlat bir-birini to‘ldiruvchi turizm salohiyatiga ega. Tarixiy shaharlar, tog‘li hududlar, Kaspiy dengizi yo‘nalishlari va boy madaniy merosni yagona sayyohlik marshrutlariga birlashtirish mintaqaning jozibadorligini oshirishi mumkin.

 

U “bir safarda bir nechta mamlakat” tamoyiliga asoslangan umumiy sayyohlik yo‘nalishlarini rivojlantirishni taklif qilgan. Shuningdek, yagona sayyohlik vizasini joriy etish tashabbusini qo‘llab-quvvatlashini bildirib, tashqi siyosat idoralariga uning aniq mexanizmlarini ishlab chiqishni topshirishni taklif etgan.

 

Bu taklif Ozarbayjon, Qozog‘iston, Qirg‘iziston, O‘zbekiston, Tojikiston va Turkmaniston rahbarlarining Avaza shahrida bo‘lib o‘tayotgan maslahat uchrashuvida ilgari surilgan.

 

2025-yilda Toshkentda o‘tkazilgan Markaziy Osiyo davlatlari rahbarlarining maslahat uchrashuvida Ozarbayjonning mazkur formatda to‘liq ishtirok etishi bo‘yicha yakdil qaror qabul qilingan edi.