“Olti iqtisodiyot – bitta mahsulot” tamoyiliga o‘tishimiz kerak — Shavkat Mirziyoyev
Prezident Turkmanistonda o‘tgan Markaziy Osiyo va Ozarbayjon davlat rahbarlarining sakkizinchi Maslahat uchrashuvida mintaqaviy hamkorlikning ustuvor yo‘nalishlarini belgilab berdi.
Shavkat Mirziyoyev Turkmanistondagi “Avaza” milliy sayyohlik zonasida bo‘lib o‘tgan Markaziy Osiyo va Ozarbayjon davlat rahbarlarining sakkizinchi Maslahat uchrashuvida ishtirok etdi.
Sammitda mintaqaviy va xalqaro masalalar, shuningdek, Markaziy Osiyo davlatlari va Ozarbayjon o‘rtasidagi hamkorlikni rivojlantirish istiqbollari muhokama qilindi.
Shavkat Mirziyoyev so‘nggi yillarda Markaziy Osiyoda yuz bergan ijobiy o‘zgarishlarda davlat rahbarlarining Maslahat uchrashuvlari muhim o‘rin tutganini ta’kidladi. U mintaqa davlatlari o‘rtasida o‘zaro hurmat, ishonch va pragmatizmga asoslangan hamkorlikni yanada rivojlantirish zarurligini qayd etdi.
Prezident savdo, transport, energetika, sanoat va yangi texnologiyalar sohalarida hamkorlikni kuchaytirish, yagona hamkorlik makonini shakllantirish taklifini ilgari surdi.
Iqtisodiy aloqalarni yangi bosqichga olib chiqish uchun qo‘shma sanoat va texnologik zanjirlar, umumiy raqamli xizmatlar hamda investitsiya mexanizmlarini yaratish zarurligi ta’kidlandi. Shu ma’noda “Olti iqtisodiyot – bitta mahsulot” tamoyili ilgari surildi.
Shuningdek, 2027-yilda Xivada Markaziy Osiyo va Ozarbayjon biznes forumini o‘tkazish, transport-logistika infratuzilmasini rivojlantirish bo‘yicha umumiy yondashuvni shakllantirish taklif qilindi.
Energetika, suv resurslari, ekologiya, muhim minerallar va sun’iy intellekt sohalarida ham qo‘shma loyihalarni amalga oshirish bo‘yicha tashabbuslar bildirildi.
Sammit yakunida davlat rahbarlari Qo‘shma bayonotni qabul qildilar hamda bir qator ko‘p tomonlama hujjatlarni imzoladilar.
