Prezident Shavkat Mirziyoyev raisligida hududlar va tarmoqlarda iqtisodiy o‘sish sur’atlarini ta’minlash bo‘yicha birinchi yarim yillik tahlili va yil yakuniga qadar ustuvor vazifalar yuzasidan videoselektor yig‘ilishi bo‘lib o‘tmoqda.
Yig'ilishda "Yashil” energetikadagi islohotlar natijasida hozirgacha ishga tushgan 2,4 gigavattli 10 ta quyosh va shamol elektr stansiyalari hisobiga birinchi yarim yillikda 1,6 milliard kilovatt “yashil" energiya olingani qayd etildi. Bu yarim milliard kub metr gazni tejash imkonini berdi.
Shuningdek, shu yilning o‘zida mahallalarni obod qilish, bog‘cha, maktab, tibbiyot, yo‘l, suv, elektr kabi infratuzilmani yaxshilash uchun byudjetdan 31,5 trillion so‘m ajratilgan. Bunga yana 1,5 trillion so‘m ajratilishi belgilandi. Yil boshidan 18 ming 600 ta yangi xonadon qurilib, foydalanishga topshirilgani ma'lum qilindi.
O‘tgan olti oyda 26 mingta oilaga 7 trillion so‘mga yaqin ipoteka krediti ajratilgan. Ular bo‘yicha boshlang‘ich to‘lov va foizni qoplash uchun 545 milliard so‘m subsidiya berilgan.