Tadbirkor o‘zining Facebook dagi sahifasida Virgin Galacticning kosmosga uyushtirgan sayohati sanasini fuqarolik kosmonavtikasi kuni deya atadi. Kuzatuvchilarini insoniyat tarixidagi muhim kun bilan tabriklab, quyidagilarni yozib qoldirdi:
“Men deyarli barcha bolaligida kosmonavt bo‘lishni orzu qilgan avlod vakiliman. Bu orzum haqida unutganimga ancha bo‘lgan ekan. Kecha, Virgin Galacticning parvozini kuzata turib, o‘g‘lim, “kosmosga uchishni istarmidingiz?”,- deb so‘radi. Ochig‘i, o‘zimni yo‘qotib qo‘ydim. Bu savolni menga chamasi 45 yillardan beri hech kim bermagan edi. Shu sabab biroz esankirab qoldim. Beixtiyor xayolan bolalikka qaytdim. Yulduzlar aro sayr orzusi, yosh texniklar jurnalidagi fantastik hikoyalar, Boyqonurdan navbatdagi raketa uchishini poylab teleekran qarshisida soatlab o‘tirganlarim yodimga tushdi. Va o‘g‘limga “ha, albatta kosmosga uchishni istardim”,- deya javob berdim. Bolalikda qachonki kosmos haqida orzu qilsam, qandaydir sayyorada, balki Oydan turib Yerimizga qarayotganimni tasavvur qilardim. Kechagi kun yangi, fuqarolik kosmonavtikasi kuniga aylandi. Ishonamanki, barchamiz qalban biroz kosmonavtmiz. Shunday ekan, barchamizni bayram bilan tabriklayman.”