Sharof Rashidov tumanida yashovchi qizning shaxsiy foto va videolarini Instagram‘da tarqatgan fuqaro qo‘lga olindi. Bu haqda IIV Kiberxavfsizlik markazi matbuot xizmati xabar berdi.
Maʼlum qilinishicha, Jizzax viloyati Sharof Rashidov tumanida yashovchi N.F. ariza bilan murojaat qilib, boshqalarga ko‘rsatib bo‘lmaydigan foto va videotasvirlarini Instagram ijtimoiy tarmog‘ida nomaʼlum shaxs tarqatayotganini bildirib, unga nisbatan qonuniy chora ko‘rishni so‘ragan.
Olib borilgan tezkor-qidiruv tadbirlari natijasida foto va videotasvirlarni tarqatayotgan Instagram akkaunti foydalanuvchisi Jizzax viloyati Jizzax shahrida yashovchi 2002 yilda tug‘ilgan M.Z. ekani aniqlangan.
Shuningdek, M.Z. ushbu foto va videotasvirlarni jabrlanuvchining tanishi Jizzax viloyati Sharof Rashidov tumanida yashagan, hozirda Rossiyaga mavsumiy ishchi sifatida ishlashga ketgan, 1995 yilda tug‘ilgan X.Sh.dan olganini va ijtimoiy tarmoqlarda tarqatish bo‘yicha X.Sh. ko‘rsatma berganini maʼlum qilgan.
M.Z. va X.Sh.ga nisbatan Jinoyat kodeksining 140-moddasi (shaxsiy hayot daxlsizligini buzish) 2-qismi bilan jinoyat ishi qo‘zg‘atilib, tergov harakatlari olib borilmoqda.