Unda aytilishicha, 2022-yilda boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirib, xarid chekini mobil ilovada ro‘yxatdan o‘tkazgan jismoniy shaxslarga oy yakuni bilan xarid summasining 1 foizi qaytariladi. Bunda olingan chekdagi QR-kod mobil ilova orqali skanerlanadi.
Biroq bu tartib avtomobil, temir yo‘l va aviachipta sotib olinganda, kommunal hamda aloqa xizmati, shuningdek, to‘lov tizimi operatorlari orqali to‘lov amalga oshirilganda amal qilmaydi
Xaridorga chek yoki ularga tenglashtirilgan hujjatlarni bermasdan tovar sotganlik yoxud xizmatlar ko‘rsatganlik haqida xabar bergan shaxslar rag‘batlantiriladi. Yaʼni qalbaki markirovka qo‘llanilgan yoki markirovka mavjud emasligi to‘g‘risida soliq organlariga maxsus dastur orqali xabar bergan jismoniy shaxslarga undirilgan jarimaning 20 foizi miqdorida mukofot to‘lanadi.
To‘lov tizimlari operatorlari o‘z to‘lov tizimlarini onlayn nazorat-kassa mashinalariga majburiy ravishda ulash va shu orqali soliq organlarining axborot tizimlariga integratsiyalashni taʼminlash talabi o‘rnatiladi.
Shuningdek, 2022-yil 1-yanvardan mahsulotlar (tovarlar va xizmatlar) yagona elektron milliy katalogi identifikatsiyalash kodlari aks ettirilmaydigan onlayn nazorat-kassa mashinasi va virtual kassa cheklarini taqdim etish taqiqlanadi.
2023-yil 1-yanvargacha tadbirkorlik subyektlariga onlayn nazorat-kassa mashinasi hamda maxsus qurilmalarning har birini sotib olish bilan bog‘liq xarajat, shuningdek, hisoblangan va to‘lanishi lozim bo‘lgan foyda solig‘i, aylanmadan olinadigan soliq yohud yakka tartibdagi tadbirkorlar tomonidan to‘lanadigan jismoniy shaxslardan olinadigan daromad solig‘i summalarini kamaytirish huquqi berildi.
Eslatma: sotib olinadigan onlayn nazorat-kassa mashinasi hamda maxsus qurilmaning har bittasi BHMning 4 baravaridan ko‘p bo‘lmagan summa miqdorida bo‘lishi lozim.
Avvalroq 1-oktabrdan qonunchilikda nimalar o‘zgargani hamda 25 yoshdan oshmagan xodimlar uchun ijtimoiy soliq summasi davlat byudjetidan qoplanishi haqida xabar berilgandi.
Olamgir Abdiyev