Eron Prezidenti Masud Pezeshkian yaqinda amalga oshirgan Tabriz safari chog‘ida noodatiy vaziyatga duch keldi. Prezidentning uchta xizmat avtomobili yo‘lda to‘xtab qoldi va u safarining bir qismini oddiy taksi yordamida davom ettirishga majbur bo‘ldi. Bu haqda prezidentning maxsus inspektori Mostafo Molaviy ma’lum qildi.
Voqea Qazvin viloyatining Taqestan shahri yaqinida yuz bergan. Prezident va uning xavfsizlik xizmati vakillari avtoulovlarda Tabriz tomon yo‘lga chiqqanida, Rasht chiqish yo‘lidagi yo‘l bo‘yidagi yonilg‘i quyish shoxobchasida avtomobillarini benzin bilan to‘ldirishgan. Ammo ko‘p o‘tmay, barcha avtomobillar texnik nosozlik sabab to‘xtab qolgan.
Tekshiruvlar natijasida aniqlanishicha, yonilg‘i quyish shoxobchasida suv aralashgan benzin sotilgan. "Bizning surishtiruvimizga ko‘ra, bu shoxobcha ilgari ham shunday qonunbuzarliklarga yo‘l qo‘ygan", — dedi Molaviy.
Prezident Pezeshkian mahalliy hokimiyatdan yordam so‘rash o‘rniga, shaxsiy tashabbus bilan oddiy taksi chaqirib, Tabrizga yo‘l oldi. "Prezident viloyat hokimining idorasiga murojaat qilmadi va hech qanday rasmiy yordam so‘ramadi. U shunchaki taksiga o‘tirdi va safarini davom ettirdi", — deydi Molaviy.
Eron Milliy Neft Mahsulotlari Taqsimoti Kompaniyasi (NIOPDC) ushbu AYoQSh ilgari ham shikoyatlarga sabab bo‘lganini tasdiqladi. Ammo shunga qaramay, mazkur shoxobcha faoliyatini davom ettirayotgani borasida izoh berilmadi.