Farg‘ona viloyati IIB axborot xizmati xabariga ko‘ra, 2021-yilning 30-oktabr kuni Quvasoy shahar, Istiqlol ko‘chasida yashovchi S.O ismli fuqaro IIBga murojaat qilgan. Unda joriy yilning yanvar oyida nomaʼlum shaxslar uning ishonchiga kirib, sotmoqchi bo‘lgan 50 tonna sement mahsulotlarini 42 million so‘mga sotib olishga kelishadi.
Qayd etilishicha, pulini bir xafta muddatda berishini aytishib, sement mahsulotlarini olib ketishib, bergan vaʼdasini bajarmasdan aldov yo‘li bilan qo‘lga kiritganliklarini hamda sement maxsulotlarni boshqa shaxsga sotib yuborib, pullarini ehtiyoji uchun sarflab yuborganliklarini bildirgan.
Olib borilgan tergovga qadar tekshiruv harakatlari davomida ushbu jinoyatni S.M va T.U.lar sodir etganligi aniqlanib, tergov harakatlari olib borilmoqda.
Mazkur holat yuzasidan Quvasoy shahar IIB huzuridagi tergov bo‘limi tomonidan Jinoyat kodeksining 168-moddasi 2-qismi (firibgarlik) bilan jinoyat ishi qo‘zg‘atilgan.
Maʼlumot uchun: yuqorida ko‘rsatilgan jinoyatni sodir etgan shaxs 5 yilgacha ozodlikdan mahrum qilish bilan jazolanishi mumkin.
Eslatib o‘tamiz, avvalroq davlat xaridlariga oid qonunbuzilish holatlari aniqlangani, Marg‘ilonda XTB sobiq mudiri 1,7 milliard so‘mni o‘zlashtirib yuborgani hamda Termizda ko‘mir o‘g‘rilariga jinoiy ish qo‘zg‘atilgani haqida xabar berilgandi.