Истиқболда Ўзбекистонда йилига 50 та юрак кўчириб ўтказилади

 

 

   Сенат матбуот хизматининг хабарига кўра, Ўзбекистонда инсон аъзолари ва тўқималари трансплантацияси қонун билан мустаҳкамланади.

 

 Хабарда айтилишича, академик В.Воҳидов номидаги Республика ихтисослаштирилган хирургия илмий-амалий тиббиёт марказида «Инсон аъзолари ва тўқималари трансплантацияси тўғрисида»ги қонун лойиҳаси, унинг мазмун-моҳиятини масъуллар иштирокида муҳокама қилишга бағишланган давра суҳбати ўтказилди.

 

   Сўнгги йилларда мазкур соҳада олиб борилган ислоҳотлар мамлакатда буйрак, жигар ва ўзак ҳужайрасини кўчириб ўтказиш амалиётини йўлга қўйилишига имконият яратди. Натижада бугунги кунгача республикада 700 дан ортиқ ана шундай операция муваффақиятли бажарилди.

 

Ўзбекистонда 5 минг нафар бемор жигар циррозидан азоб чекса, уларнинг 500 нафари, яъни 10 фоизи жигар трансплантацияси амалиётига муҳтож. Бугунги кунга қадар мамлакатимизда жами 10 та жигар трансплантацияси амалга оширилди.

 

   Режага кўра, йилига 250 та буйрак кўчириб ўтказиш, 50 та жигар трансплантациясини амалга оширилади. Шунингдек, юрак трансплантацияси йўлга қўйилади ва йилига 50 та мана шундай мураккаб жарроҳлик амалиёти ўтказилади. Ўпка кўчирилишига эҳтиёжи бор 30 нафар инсон шу турдаги операциядан ўтади, — дейилади Сенат хабарида.

 

 

Чўлпоной Аҳмедова