Карантин қоидаларини бузган чехиялик фуқарога 3 йиллик қамоқ жазоси хавф солмоқда
У касалликни атайлаб тарқатишда айбланмоқда.
Чехиянинг Влашим шаҳрида яшовчи шахс коронавирусни қасддан тарқатишда айбланмоқда, бунинг учун у уч йиллик қамоқ жазосига ҳукм қилиниши мумкин.
Бу ҳақда ҳуқуқ-тартибот идоралари ходимларига таяниб, Влеск газетаси хабар берди.
Қайд этилишича, ўтган йилнинг ноябрь ойида 43 ёшли эркакка коронавирус учун ижобий тест топширганидан кейин ўзини изоляция қилиш буюрилган. Шунга қарамай, касалланган киши жамоат жойларига ниқоб ва респираторсиз борган.
Хусусан, у ёнғин содир бўлган пайтда ўз қариндошларининг уйида ҳимоя воситаларисиз бўлган, натижада воқеа жойида ишлаган 80 га яқин ўт ўчирувчилар, полициячилар ва тиббиёт ходимларига юқтириш хавфи туғилган.
Умуман олганда, полиция аниқлаганидек, эркак 100 га яқин одам билан алоқада бўлган. Улардан қанчаси COVID билан касаллангани аниқланмади.
Қоидабузарга нисбатан жиноий иш очилган.
Эслатиб ўтамиз, Буюк Британия бош вазири Борис Жонсон карантин қоидаларини бузганликда айбланмоқда - биринчи карантин пайтида у 100 киши иштирокида зиёфат уюштирган.
Аввалроқ ЖССТ ҳомиладор аёллар ҳам коронавирусга қарши эмланиши кераклигини маълум қилганди.
