“Кексалар туризм ойлиги” муносабати билан чегирмалар жорий қилинди

 

 

Хабарингиз бор, 2020-йил 28-майда “Кексаларни давлат томонидан қўллаб-қувватлаш тизимини янада такомиллаштиришнинг қўшимча чора-тадбирлари тўғрисида”ги Вазирлар Маҳкамасининг қарори тасдиқланган эди. Унга мувофиқ, “Кексаларни давлат томонидан қўллаб-қувватлаш тизимини янада такомиллаштириш бўйича чора-тадбирлар дастури” ишлаб чиқилган бўлиб, жорий йилнинг Ноябрь ойи “Кексалар туризм ойлиги” дея эълон қилинди. Дастурнинг асосий мақсади, мамлакат бўйлаб кекса авлод вакилларининг саёҳат қилишини таъминлаш ҳисобланади.

 

“Кексалар туризм ойлиги”ни муносиб ўтказиш, уларнинг дам олишларини мароқли ташкил этиш ҳамда ички туризмни ривожлантириш мақсадида Республикадаги 223 та жойлаштириш воситаси, яъни меҳмонхоналар ва меҳмон уйлари хизматлари учун - 50 фоизгача чегирмалар жорий этилади. Шунингдек, яна 204 та умумий овқатланиш масканларидаги хизматлар учун ҳам 20 фоизгача ихтиёрий чегирмалар тақдим қилинади.

 

Шу билан бирга, “Uzbekistan Airways” АЖ томонидан 1-30 ноябрь кунлари Республика ичидаги авиақатновларда эконом ва бизнес тоифаларининг (ЛПР3М, УПР3М, СПР3М, ОПР3М ташқари) жорий нархларига 25 фоиз миқдорда ихтиёрий чегирмалар берилади. Бундай имтиёз 60 ёшдан юқори эркаклар ва 55 ёшдан юқори бўлган аёллар учун тақдим қилинади.

 

“Ўзбекистон темир йўллари” АЖ ҳамда “Uzautotrans Service” МЧЖ томонидан маҳаллий йўналишлар учун чипталарнинг амалдаги тариф нархларига 10 фоиз миқдорида ихтиёрий чегирмалар жорий қилинади.

 

Бундан ташқари, кексаларни зиёратгоҳ ва маданий мерос объектларига, жумладан, Тошкент шаҳри, Самарқанд ва Хоразм вилоятларидаги 6 та зиёратгоҳга кириш учун нафақа ва кекса ёшдаги фуқароларга Ўзбекистон Мусулмонлар идораси ҳузуридаги “Вақф” хайрия жамоат фонди томонидан 50 фоиз миқдорида чегирмалар белгиланган.

 

Маданий мерос агентлиги томонидан эса Қорақалпоғистон Республикаси, Бухоро, Қашқадарё, Самарқанд, Сирдарё ва Хоразм вилоятларидаги 24 та маданий мерос объектларига кириш учун 20 фоиз миқдорда чегирмалар жорий этилган.

 

Аввалроқ энг кам ёшга доир пенсия, иш ҳақи ва яна шунга ўхшаш нафақалар ҳамда хусусий шифохона томонидан кимлар бепул даволаниши мумкинлиги ҳақида хабар берилганди.

 

Оламгир Абдиев