Belarus va Eron 2023–2026 yillarga mo‘ljallangan keng qamrovli hamkorlik bitimini tuzdi. Hujjatni Eron prezidenti Ibrohim Raisiy va Belarus rahbari Aleksandr Lukashenko imzoladi.
Kelishuv iqtisodiy-siyosiy, ilmiy-texnikaviy hamkorlikni, shuningdek, taʼlim, madaniyat, sanʼat, OAV va turizm sohalarini qamrab oladi. Shuningdek, ikki davlat o‘rtasida diplomatik munosabatlar o‘rnatilganining 30 yilligi munosabati bilan hukumatlararo karantin va o‘simliklarni muhofaza qilish sohasidagi kelishuvlar, ozodlikdan mahrum qilingan shaxslarni jazoni o‘tash muddatini davom ettirishi uchun topshirish bo‘yicha chora-tadbirlar rejasi imzolangan
Bundan tashqari, avtomobil sohasidagi bitimga o‘zgartirishlar kiritish bo‘yicha protokol tuzilgan. Ikki davlat madaniyat vazirliklari, Davlat standarti va Eron standartlashtirish milliy tashkiloti, savdo sohasida iqtisodiy hamkorlik bo‘yicha Belarus-Eron komissiyasi hamraislari o‘rtasida memorandumlar imzolangan.
Eslatib o‘tamiz, 1 mart kuni Lukashenko Xitoyga tashrif buyurgan va u yerda Xitoy rahbari Si Szinpin bilan uchrashgandi. Belarus rahbari Xitoyning “tinchlik rejasini” to‘liq qo‘llab-quvvatlashini aytgan.