Dastlabki o‘rganishlar natijasida maʼlum bo‘lishicha, korxonada ishlovchi ikki xodim o‘rtasida o‘zaro kelishmovchilik oqibatida mushtlashuv yuz bergan. Keyinchalik mushtlashuvga ikki tomondan ham ishchilar aralashib ketgan.
Ish beruvchi vakillari tomonidan taqdim etilgan maʼlumotlarga ko‘ra, hozirgi vaqtda 41 nafar tojikistonlik va 85 nafar o‘zbekistonlik mehnat migrantlari hibsga olingan. Ularning 20 nafariga nisbatan deportatsiya qilish chorasi qo‘llanishi kutilmoqda.
Shu bilan birga, Tashqi mehnat migratsiyasi agentligining Moskva shahridagi vakolatxonasi Elchixona bilan birgalikda vakolatli tashkilotlar orqali mazkur masalani ijobiy hal etish choralarini ko‘rmoqda.
"Tashqi mehnat migratsiyasi agentligi xorijda vaqtinchalik mehnat faoliyatini amalga oshirayotgan yurtdoshlarimizdan ushbu davlat qonunlariga rioya qilishni, nizoli vaziyatlarga aralashmaslikni, muammoli yoki nizoli vaziyatlarda vakolatli organlar hamda mamlakatimizning ushbu davlatdagi diplomatik idoralariga murojaat qilishni so‘raydi", — deyiladi xabarda.