Наманган ва Фарғонада тиббий буюмларнинг ноқонуний айланмаси билан шуғулланувчи шахслар ушланди
Тезкор тадбир давомида жами 230 млн сўмлик тиббий восита ва ускуналар аниқланган.
Тезкор тадбирлар давомида Фарғона вилоятининг Олтиариқ туманида “Isuzu” автомобили орқали божхона расмийлаштирувидан ўтмаган тиббий ускуналарни олиб кираётган шахс ушланган.
Аниқланишича, автомашина юкхонасида хорижда ишлаб чиқарилган ва умумий қиймати 80 миллион сўмлик 2 дона лазерли тиббиёт ускуналари бор бўлган.
Шунингдек, Наманган шаҳрида ўтказилган тезкор тадбирда “Дамас” русумли автомашина орқали умумий қиймати 44 млн сўмлик 11 минг дона тиббиёт буюмлари ноқонуний олиб кирилаётгани аниқланган.
Бундан ташқари, Наманган шаҳрида яшовчи фуқаронинг яшаш хонадони кўздан кечирилганда, унинг уйидан умумий қиймати 106 млн сўмлик 31 минг дона тиббиёт буюмлари топилган.
Ҳозирда мазкур ҳолатлар юзасидан божхона органлари томонидан суриштирув ҳаракатлари олиб борилмоқда.
