Yer qaʼridan foydalanganlik uchun sement ishlab chiqarishga mo‘ljallangan ohaktosh bo‘yicha amalda bo‘lgan 22,5 ming so‘m soliq stavkasi 1 tonna uchun 6 ming so‘mga pasaytirilishi bo‘yicha "O‘zsanoatqurilishmateriallari" uyushmasi rasmiy bayonot berdi.
2023 yil 28 dekabrda qabul qabul qilingan 891-sonli Qonunda sement ishlab chiqarishda ohaktoshga yer qaʼridan foydalanganlik uchun soliq stavkasi 6 ming so‘m etib belgilandi.
Uyushma axborot xizmati maʼlum qilishicha, 5 foizlik soliq stavkasi 2019 yildan boshlab oshirilgan va bugungi kunda qadar har bir tonna ishlab chiqarilgan ohaktosh uchun 22,5 ming so‘m (yoki ohaktosh tannarxining 75 foizi) etib belgilanganligi sement narxlarini oshishiga olib keldi. Hozirda bir kilogramm ohaktoshning o‘rtacha narxi – 30 ming so‘mni tashkil etadi.
"O‘zsanoatqurilishmateriallari" uyushmasi sement ishlab chiqarish uchun ohaktoshga soliq stavkasini 4 baravarga kamaytirilishi ushbu mahsulotlarning mahalliy ishlab chiqaruvchilar o‘rtasidagi raqobatbardoshligini oshirishiga xizmat qiladi deb hisoblaydi, — deyiladi xabarda.
Stavkalar pasaytirilganligiga qaramasdan, yer qaʼridan foydalanganlik uchun soliq stavkasi ohaktosh tannarxidan O‘zbekistonda – 20% ni, Qozog‘istonda – 4,7%, Qirg‘izistonda – 3%, Tojikistonda - 7%ni tashkil etadi.