Оммавий муштлашувда иштирок этган 50 нафарга яқин мигрант “депорт” қилинди
Россиядаги оммавий муштлашувда иштирок этган 50 нафарга яқин мигрант мамлакатдан “депорт” қилинди.
Бу ҳақида “Спутник” хабар бермоқда.
Москва полицияси матбуот хизмати бошлиғи Владимир Васенин сўзларига кўра, "Кузминки" метро бекати яқинида оммавий муштлашувда иштирок этган 46 нафар хорижлик Россиядан депортация қилинган. Яқин кунларда яна 41 нафар мигрант Россиядан чиқариб юборилади.
ИИВ вакилининг сўзларига кўра, суд қарори билан 87 киши Россия ИИВ Москвадаги бош бошқармаси чет эл фуқароларини вақтинча сақлаш марказига 90 сутка муддатга жойлаштирилди.
Саккиз нафар мигрантга нисбатан "безорилик" моддаси бўйича жиноят иши қўзғатилди.
Аввалроқ Москва вилоятидаги Одинцово ва Митиши шаҳарларида ҳам иккита оммавий тўқнашув бўлиб ўтгани хақида хабар берган эдик. Унда жами 60 нафарга яқин муҳожир қатнашган эди. Гувоҳларга кўра, иштирокчиларнинг қўлида пичоқ ва темир бўлаклари бўлган. Воқеа оқибатида ИИВ қўлга олинган муҳожирларни қайта мамлакатга кириш ҳуқуқидан маҳрум қилиб, депорт қилган эди.
