Ўзбекистон Беларусь ва Россиядаги сайловлар кузатувчиси бўлиши мумкин
МДҲга аъзо давлатлар сайлов органлари раҳбарлари Маслаҳатлашув кенгашининг Регламенти тасдиқланди.
Ўзбекистон келаси йил Беларусь ва Россияда ўтадиган сайловларда кузатувчи сифатида иштирок этиши кутилмоқда. Бу ҳақда Мустақил Давлатлар Ҳамдўстлигига (МДҲ) аъзо давлатлар сайлов органлари раҳбарлари Маслаҳатлашув кенгашининг II йиғилишида маълум қилинди.
Ўзбекистон раислигида МДҲга аъзо давлатлар сайлов органлари раҳбарлари Маслаҳатлашув кенгашининг II йиғилиши бўлиб ўтди. Унда Арманистон, Беларусь, Қирғизистон, Тожикистон, Ўзбекистон, Россия сайлов органлари раҳбарлари иштирок этди.
Мустақил Давлатлар Ҳамдўстлигига (МДҲ) аъзо давлатлар сайлов органлари раҳбарлари Маслаҳатлашув кенгашининг II йиғилиши
МДҲ бош котиби ўринбосари Илҳом Неъматовнинг сўзларига кўра, Кенгаш сайлов тизими ва қонунларни халқаро стандартларга мувофиқ такомиллаштириш бўйича тажриба алмашиш учун яхши имконият яратмоқда.
Йиғилишда МДҲга аъзо давлатлар сайлов органлари раҳбарлари Маслаҳатлашув кенгашининг регламенти тасдиқланди.
Ҳужжат беш бўлимдан иборат. У кенгашнинг иш тартиби, унинг мажлисларини ташкил этиш ва ўтказиш, кенгаш кўриб чиқиш учун киритиладиган ҳужжатларни тайёрлаш ва қабул қилиш, қарорларнинг ижросини таъминлаш тартибини белгилайди.
“2024 йил 25 февралда бўлиб ўтадиган Беларусь республикаси Миллий Ассамблеяси Вакиллар палатасининг депутатлари сайлови ҳамда 17 мартда бўлиб ўтадиган Россия Федерацияси президенти сайловини мониторинг қилишда кенгаш аъзоларининг иштироки муҳокама қилинди”, — дейилади хабарда.
Кун тартибига ёшларни сайлов жараёнларига жалб этиш масаласи ҳам киритилди.
Қайд этилишича, кенгашнинг навбатдаги йиғилиши 2024 йилнинг иккинчи ярмида Тошкентда ўтказилади.
