Қорақалпоғистондан Тошкентгача бир ҳафталик саёҳат. Фақат бу гал ўзгача тарзда — велосипед билан

 

 

Равшан Яқшимуратов Қорақалпоғистоннинг Беруний тумани Тинчлик овулида яшайди. У Беруний туманидан Тошкент шаҳригача бўлган йўлни шахсий велосипедида ёлғиз ўзи  бир ҳафта давомида босиб ўтди.

 

 

“Zamon.uz” мухбири Равшан Яқшимуратов билан ана шу ҳақда суҳбатлашди.

 

 Велосипедда сайёҳат қилиш сизнинг хоббингизми? Бунга қизиқиш сизда қачондан бошланган?  

 

- Велосипедни болалигимдан яхши кўраман. Бу мен учун қўшимча машғулот. Aсл мутахассислигим — бухгалтер-назоратчи.

 

 Бу марафон қачон ва қандай бошланди?  

 

- Жорий йил август ойида Мустақиллигимизнинг 30 йиллиги муносабати билан "Қудратли Ўзбекистоннинг ўтмиши ва келажаги буюк" шиори остида веломарафон ўтказиш ташаббуси билан чиққан эдим. Бу таклифимни Туризм ва спорт вазирлиги илиқ қарши олди. 22 август куни Беруний тумани ҳудудида жойлашган Фир қалъасидан йўлга чиқдим. Веломарафон бир ҳафта давом этди: 28 август куни Тошкент шаҳрига кириб келдим.

 

 Марафондан кўзланган асл мақсад-муддаонгиз нима эди?

 

 

- Беруний-Самарқанд-Тошкент йўналишидаги веломарафондан кўзланган асл мақсад — буюк сиймоларга эҳтиром кўрсатиш, бой тарихимизни тарғиб этиш, саломатликни тиклашга эътибор қаратиш, янги Ўзбекистонни бунёд қилишда ёшларга мотивация бериш, янги авлодни ватанпарварлик руҳида тарбиялашга ҳисса қўшишдан иборат.

 

 Велосипед билан саёҳат сизда қандай таассурот қолдирди?

 

- Самарқандга келиб дастлаб бу қадимий шаҳарнинг Aфросиёб қалъаси қолдиқлари ва  Биринчи Президентимизнинг қабрини зиёрат қилдим. Жиззах довонида Худо асради. Велосипедда давлатимиз байроғини ўзим билан бирга олган эдим. У менинг бир фалокатдан омон қолишимга сабабчи бўлди. Довондан тушаётганимда велосипед шитоб билан пастга отилди. Тормоз ишламай қолди. Бурилишдаги йўл тўсинига урилиб, жарга қулаб тушишимга бир баҳя қолди. Аллоҳга минг қатла шукр байроқ ён томондаги тўсинга қадалиб велосипедни тўхтатишига сабаб бўлди. Қаранг, Аллоҳ мени омон қолишимга байроғимизни сабабчи қилиб қўйди. Мен буни ҳеч қачон унута олмасам керак.

 

Йўлга чиққан кунимдан бошлаб танти ва меҳмондўст халқимиз мени олқишлаб, қўллаб-қувватлаб турди. Тунда уйидан жой берди. Хоразм ва Бухоро чўлларини босиб ўтишда йўл ёқасида чодир тикиб тонг оттирдим. Йўл-йўлакай юртимиз табиати, одамлари, боғ-роғлари билан яқиндан  танишдим. Таассуротларим бир олам. Бир китобга сиғмаса керагов (кулади).

 

Энг муҳими, минг километрдан ортиқ йўл юрсам ҳам велосипедим панд бермади.

 

Тошкентга етиб келганингизда сизни қандай кутиб олишди? 

 

 

- Тошкент шаҳрига кириб келишим билан мени Туризм ва спорт вазирлиги масъул ходимлари кутиб олди. Пойтахтимизнинг диққатга сазовор жойларини сайр қилдик. Мени Бош вазири ўринбосари - туризм ва спорт вазири Aзиз Aбдуҳакимов қабул қилди. Учрашувда вазир мен бошлаган ташаббус ички туризмни ривожлантиришда муҳим ўрин тутишини алоҳида таъкидлади. Мустақиллик байрами билан табриклаб, менга янги ва замонавий велосипед совға қилди.

 

 Келажакда яна қандай  режаларингиз бор?

 

- Туризм ва спорт вазири билан бўлган учрашувда Тошкент-Aшхабод-Душанбе-Бишкек–Нур-Султон йўналиши бўйича "Дўстлик" веломарафони ташкил қилиш ниятим борлигини маълум қилдим. Бу веламарафон орқали Марказий Осиё минтақаси халқлари — ўзбек, қозоқ, қирғиз, туркман ва тожик халқлари ўртасидаги дўстлик алоқаларини янада мустаҳкамлашга ўз ҳиссамни қўшмоқчи эканимни айтганимда вазир менга ўз ваколати доирасида ёрдам беришга тайёрлиги ва қўллаб-қувватлашини билдирди.

 

 

Мафтуна Режаббоева суҳбатлашди.