Qoidaga ko‘ra, jamoat joylarida tibbiy niqobsiz yurish bo‘yicha qoidabuzarliklar uchun jarima miqdori Maʼmuriy javobgarlik to‘g‘risidagi kodeksning (MJtK) 54 moddasi bilan belgilanadi. Huquqbuzarlar BHMning 5 baravarigacha (1 million 350 ming so‘m) jarimaga tortilishi ko‘zda tutilgan.
COVID-19 ning yangi shtammi kirib kelishi munosabati bilan karantin qoidalariga rioya qilinishini nazorat qilish bo‘yicha IIV tomonidan belgilangan tartibdagi nazorat choralari, yaʼni fuqarolarni tibbiy niqobda bo‘lishlarini nazorat qilish, savdo va jamoat tadbirlari bo‘ladigan joylarda karantin qoidalariga rioya etishlarini nazorat qilib boriladi.
Samarqand viloyat ichki ishlar boshqarmasi axborot xizmati rahbari Jahongir Sag‘dullayev ayni kunlarda viloyatda IIB xodimlari tomonidan niqob taqmagan fuqarolarga tushuntirish ishlari olib borilayotganini maʼlum qildi.
“Niqob taqmagan fuqarolarga tegishli qoidalar batafsil tushuntirilgach, rasman ogohlantiriladi. Ammo shundan keyin ham yana aynan o‘sha fuqaro tibbiy niqob taqmagan holda qayd etilsa jarima qo‘llashga majbur bo‘lamiz”, deydi J.Sag‘dullayev.
Maʼlumot uchun: 9 yanvar kuni COVID-19 ga qarshi kurash bo‘yicha maxsus komissiya karantin choralarini kuchaytirish to‘g‘risida qaror qabul qildi. Barcha tashkilotlarga xodimlarni faqat emlanganidan keyin ish joyiga kiritishga ruxsat beriladi.
Davlat organlariga har qanday tadbir o‘tkazish taqiqlanadi. Aholini to‘liq emlash jarayoni jadallashtiriladi.
Eslatib o‘tamiz, avvalroq Toshkent shahrining 12 ta tumanida maxsus COVID poliklinikalari ish boshlashi hamda koronavirusga qarshi vaksinaning 2022 yilgi partiyasi olib kelingani haqida xabar berilgandi.
Cho‘lponoy Ahmedova