O‘zbekiston Respublikasi Prezidenti Shavkat Mirziyoyev amaliy tashrif bilan Xo‘jand shahriga yetib bordi.
Toshkentdan kelgan davlat rahbarini aeroportda Tojikiston Respublikasi Prezidenti Emomali Rahmon kutib oldi. Tashrif munosabati bilan aeroport hududida ikki davlat bayroqlari hilpiradi, milliy kuy-qo‘shiqlar yangradi va an’anaviy raqslar ijro etildi.
Bugun O‘zbekiston, Tojikiston va Qirg‘iziston prezidentlari uch tomonlama uchrashuv o‘tkazadilar.
Kun tartibidan do‘stlik, yaxshi qo‘shnichilik va strategik sheriklikni mustahkamlash, shuningdek, savdo-iqtisodiy hamda madaniy-gumanitar hamkorlikni kengaytirish masalalari o‘rin olgan.
Shuningdek, uchrashuv yakunida O‘zbekiston, Tojikiston va Qirg‘iziston davlat chegaralarining tutash nuqtasi bo‘yicha kelishuv imzolanishi rejalashtirilgan.
Prezidentlar, shuningdek, san’at ustalari ishtirokidagi qo‘shma konsert dasturini tomosha qilishadi.