Толиблар журналистни калтаклади
TOLONews нашри мухбири толиблар томонидан калтакланди.
Маълум бўлишича, журналист Зиёр Йад ва оператор Кобулдаги қашшоқлар ва ишсизлик ҳақида лавҳа тайёрлаш вақтида толиблар томонидан калтакланган. Ушбу ҳодиса Кобулнинг Ҳожи-Ёқуб мавзесида бўлиб ўтган. Толиблар журналист телефони ва видеокамерасини ҳам тортиб олган.
Таҳририятнинг хабар беришича, бундан аввал бошқа ҳудудларда ҳам ОАВ ходимларига ҳужумлар кузатилган. Аммо ошкор қилинмаган. Зиёр Йад автомат қўндоғи билан калтакланганини айтди.
Парвон вилояти Журналистлар ассоциацияси раиси ўринбосари Парвиз Аминзода “ ‘Толибон’ нинг бутун мамлакатни назоратга олгандан кейин мухбирларга қандай муаомала қилиши хавотир уйғотади”,- деб айтган.
Ўз навбатида “Толибон” нинг маданият қўмитаси раиси ўринбосари Аҳмадулла Восиқ журналистларга таҳдид қилинганини, аммо улар калтакланмаганини маълум қилди. Шунингдек, Восиқ бу ҳодисага жиддий ёндашилганлигини, суриштирув ишлари давом этишини таъкидлади.
Эслатиб ўтамиз бундан аввал “Толибон” ОАВ муаммоларини ҳал қилиш учун уч томонлама қўмита тузганлиги хабар қилинган эди.
Жаҳонгир Қўзиев
