Chilonzor tumanida 58 tup manzarali va mevali daraxtlarni noqonuniy kesishda gumon qilingan uch nafar shaxs qo‘lga olindi.

 

Shuningdek, boshqarma tomonidan daraxtlarni kesish bilan shug‘ullangan qurilish tashkiloti rahbari tomonidan o‘simlik dunyosiga yetkazilgan 797,7 million so‘m miqdoridagi zarar to‘liq qoplangani qayd etilgan.

 

Xususan, Toshkent shahar Ekologiya boshqarmasi boshlig‘i F.D. 9 sentyabr kuni JKning 205-moddasi 2-qismi “a” bandi (Hokimiyat yoki mansab vakolatini suiisteʼmol qilish, o‘ta yirik zarar yetkazish)da nazarda tutilgan jinoyatni sodir etishda gumon qilinuvchi shaxs sifatida ushlangan.

 

“F.D. Toshkent shahar Ekologiya va atrofni muhofaza qilish boshqarmasi boshlig‘i lavozimida ishlab kelib, asosiy vazifasi ekologiya va atrofni muhitni muhofaza qilishga oid qonunchilik talablari ijrosi ustidan nazoratni amalga oshirish kerak bo‘lgan holda o‘z mansab vakolatlarini suiisteʼmol qilib, go‘yoki daraxtlarni ko‘chirishga ruxsat berganligi vaji bilan ularni nobud qilinishiga sharoit yaratib bergan”, – deyiladi Bosh prokuratura xabarida.

 

Kuni kecha Toshkentning Uchtepa tumanida ham xuddi shunday voqea sodir bo‘ldi: quruvchi tashkiloti tomonidan 50 ga yaqin daraxtni kesib tashlandi va 425,1 million so‘m moddiy zarar yetkazilib, qurilish tashkiloti mansabdor shaxslariga nisbatan jinoyat ishi qo‘zg‘atildi.