Тошкентда дорихонани ўмарган икки босқинчи қўлга олинди
Пойтахтимизнинг Яшнобод тумани “Авиасозлар” даҳасида жойлашган дорихоналардан бирига 2 нафар шахс бостириб кириб сотувчидан психотроп дори воситаларини талаб қилган.
Ўзаро тил бириктириб ҳаракат қилган босқинчиларнинг важоҳатидан ваҳимага тушган дорихона ходими иш жойини ташлаб орқа эшикдан қочиб кетган.
Жиноятчилар ушбу вазиятдан унумли фойдаланиб, кассадаги 1 миллион сўмга яқин пул, уяли телефон аппарати, видеокузатув камераси хотирасини ўзида сақловчи қурилма ва бир қанча дори воситаларини олиб воқеа жойидан яширинган. Аммо босқинчилар қувончи узоққа чўзилмади. Шу куни Яшнобод тумани ички ишлар органи ходимлари олиб борган тезкор қидирув тадбирлари натижасида ҳар иккала босқинчи шахсига ойдинлик киритилди.
Гумондорлар С.М ва И.К яшаётган уйидан ушланди.
Мазкур ҳолат юзасидан босқинчиларга нисбатан Жиноят кодексининг 164 моддаси 2 қисми Б банди билан жиноят иши қўзғатилди. Айни пайтда уларга нисбатан қамоққа олиш эҳтиёт чораси қўлланилган. Дастлабки тергов ҳаракатлари олиб борилмоқда.
