Туркияга келин бўлган ўзбек қизи тиллоларни олиб, уйидан қочиб кетди. У эрини севмаганмиди? (видео)
Куни кеча ижтимоий тармоқларда Туркияда ўзбекистонлик келин оиладаги қимматбаҳо тақинчоқларни ўғирлаб, қочиб кетгани ҳақида хабарлар тарқалганди.
Унда айтилишича, Зебунисо турк оиласи томонидан қилинган ҳадялар ва кийимларини олиб, уйни тарк этган. Лавҳа давомида келиннинг янги оиласи ўзларининг қизлари йўқлиги боис, Зебунисони ўз қизларидек қабул қилганини ва жуда яхши кўриб қолишганини айтишади. Воқеадан сўнг уни излашади, бироқ топа олишмайди. Бундан “шок”ка тушиб, видеотасвирларни турк телевидениесининг SHOW HABER дастурига тақдим этишган.
Куёв, турмуш қургунга қадар икки ёш севишишганини, ваъдалашганини айтади. Аммо тўйдан сўнг бир неча кун ўтиб келин бошқасини севаман, деган. — Биз ҳадя қилган ҳамма нарсалари олиб, қочиб кетди, дея гапига қўшимча қилган куёв.
Турк оиласининг айтишича, келин 30 минг лира атрофида (1 та никоҳ узуги, 2 та билак узук, ва 4 та медальонга ўхшаган тилла) ўғирлаб кетган.
Қайнота ҳозир Зебунисони полиция излаётганини, келин қизи топилиб уйига келишини, агар ўғли билан яшашни истамаса расмий ажрашиб, сўнг Ўзбекистонга кетишини талаб қилмоқда.
Ўзбекистоннинг Истанбул шаҳридаги Бош консулхонаси ҳолат юзасидан расмий маълумот берди:
“Айни вақтда Туркиянинг ОАВ ва ижтимоий тармоқларида (Tik Tok va Youtube) кенг тарқалган Ўзбекистондан Туркияга келин бўлиб тушган ва айни вақтда уйидан қочиб, ўғирликда айбланаётган фуқаро Д.З.га нисбатан қўйилаётган айбловлар бўйича ҳолат Ўзбекистон Республикасининг Истанбул шаҳридаги Бош консулхонаси томонидан назоратга олинганини маълум қиламиз”, дейилади хабарда.
Шу билан бирга, Бош консулхона томонидан мазкур ишни ўрганиб чиқиш учун адвокат жалб қилинган. Қайд этилишича, ҳодисага қонуний баҳо берилгандан сўнг қўшимча тарзда маълумот берилади.
Баҳринисо МАДУМАРОВА
