Unga ko‘ra, kreditlar qarzni qaytarish, to‘lovni to‘lash, taʼminlash, muddatli va maqsadli tarzda sarflash shartlari bilan banklar tomonidan beriladi. Bundan tashqari, kreditlar yoshlarning alohida toifalariga garovsiz asosda ajratiladi. Buning uchun “Saxovat va ko‘mak”, “Ayollar daftari”, “Yoshlar daftari” jamg‘armalari kafilligini taqdim etish lozim. Kafillik berilgani uchun to‘lov (mukofot puli) undirilmaydi.
Shuningdek, qarz oluvchilar 18 yoshga to‘lgan va 30 yoshdan oshmagan, ilgari arzon uy-joy qurish dasturlari doirasida imtiyozli ipoteka krediti olmagan, yangi turmush qurgan bo‘lishi zarur. Bunda ikkala tomon uchun birinchi marotaba turmush qo‘rgan bo‘lishi lozim.
Mazkur mezonlarga ko‘ra, yoshlarning alohida toifalariga kreditlar ajratiladi. Bunda muayyan talablar ham mavjud. Jumladan:
➖ bozor stavkasida mijoz xohishiga ko‘ra 6 oy imtiyozli davr bilan;
➖ 20 yildan ko‘p bo‘lmagan muddatga;
➖ boshlang‘ich badali yakka tartibdagi xonadonda qo‘shimcha qurilayotgan uy-joy qiymatining 15 foizidan kam bo‘lmagan miqdorda;
➖ bir qarz oluvchiga 33 million so‘mdan oshmaydigan miqdorda beriladi.
Tegishli hujjatlar to‘liq taqdim qilingandan so‘ng bank 3 ish kunida ariza beruvchiga kredit berish masalasini ko‘rib chiqadi.
Ariza qanoatlantirilgandan so‘ng kredit shartnomasi imzolanadi.
Bundan avval yoshlarni qo‘llab-quvvatlashga oid qo‘shimcha chora-tadbirlar tasdiqlangani, “Yoshlar daftari”ga kiritilgan yoshlar ko‘zbo‘yamachilik bilan daftardan chiqarilayotgani hamda “Bolalar puli”ni olish oila aʼzolariga taqsimlanadigan oylik daromadga bog‘liq bo‘lishi haqida xabar berilgandi.
Jamshidbek Amirov