Фарғона вилояти делегациясининг Қирғизистонга сафари давомида икки томон ўртасида ўндан ортиқ шартномалар имзоланди

Фарғона вилояти ҳокими ўринбосари Иқболжон Эргашев бошчилигидаги делегация Қирғизистоннинг Норин вилоятида бўлди. Бу ҳақда «Дарё» мухбири Азизжон Эрматов хабар бермоқда.

Қайд этилишича, Фарғона вилояти делегациясининг Қирғизистоннинг Норин вилоятига сафари давомида ўндан ортиқ келишув ва битимлар тузилган.

Норин вилояти губернатори Собирқул Ашимбаев ҳамда Фарғона вилояти ҳокимининг ўринбосари Иқболжон Эргашев томонидан икки вилоят ўртасида савдо-иқтисодий ҳамкорликни чуқурлаштириш бўйича келишув имзоланган.

Шундан сўнг «Норин» эркин иқтисодий зонаси ҳамда «Қўқон» эркин иқтисодий зонаси ўртасида ҳамкорликни ривожлантириш, Норин шаҳридаги Марказий Осиё халқаро университети ҳамда Фарғона давлат университети ўртасида олий таълим соҳасида ҳамкорлик ўрнатиш, шунингдек, Фарғона ва Норин вилоятлари ўртасида қўшма туризм лойиҳаларини шакллантириш юзасидан меморандумлар имзоланган.

Ҳар икки вилоят тадбиркорлари ва ишбилармонлари иштирок этган бизнес форуми ҳам самарали ўтган. Форумда савдо, инвестициялар, қишлоқ хўжалиги, чорвачилик соҳаларида қатор келишувларга эришилган.

Хусусан, Тошлоқ, Қува, Фарғона туманлари, Қувасой шаҳри ишбилармонлари қирғизистонлик ҳамкорлар билан экспорт-импорт ва ишлаб чиқариш лойиҳаларини амалга ошириш йўналишларида муҳим шартномалар тузишган.

«Қўқон» эркин иқтисодий зонаси раҳбари Фаррух Раҳмоновнинг маълум қилишича, қирғизистонлик тадбиркорлар билан 2021 йил давомида 10 миллион доллар миқдоридаги маҳсулотлар учун шартномалар имзоланган.