Энди коррупционерларга белгиланган жазо енгиллаштирилмайди
Кеча АОКАда “Коррупцияга қарши муросасиз муҳит яратиш, давлат ва жамият бошқарувида коррупциявий омилларни кескин камайтириш”га қаратилган Президент Фармони ва қарори мазмун-моҳияти ҳамда аҳамияти мавзусида матбуот анжумани бўлиб ўтди. Унда Ўзбекистон Республикаси Адлия Вазирлиги, Бош прокуратура, Олий Суд ва Коррупцияга қарши кураш агентлиги вактллари иштирок этишди.
Анжуманда сўзга чиққан Адлия вазири Руслан Давлетов коррупцияга қарши уч йилда бир марта мажбурий ўқитиш тизими жорий этилишини маълум қилди. Ўқитиш тизими бўйича алоҳида платформа ишга туширилади ва унда барча давлат хизматчилари ўқитилади.
Эндиликда коррупциявий ҳолатлар бўйича ОАВ вакилларига ва жамоатчиликка маълумот бериш аниқ муддатлари ишлаб чиқилади. Бу ҳақда Коррупцияга қарши кураш агентлиги директори Акмал Бурҳонов маълумот берди. Бундан ташқари, ҳар чорак якунида Коррупцияга қарши кураш миллий кенгашига давлат дастурида белгиланган чора-тадбирлар ижроси бўйича ахборот киритиб борилади.
Олий Суд раиси Ўринбосари Икрам Муслимовнинг маълумот беришича, эндиликда коррупционерларга нисбатан белгиланган жазони ўташида енгиллик берилмайди. Муслимов бу охирги чора сифатида қўлланилаётганлиги ва масаланинг нақадар долзарблигига эътибор қаратди. Эндиликда коррупционерлар муддатидан олдин озодликка чиқарилмайди, уларга бегиланган жазо енгилига алмаштирилмайди.
