Андижонда эрини унитаз қопқоғи билан уриб ўлдирган 63 ёшли аёл қамалди
Андижон шаҳридаги Саховат уйида шаръий никоҳдаги эрини унитаз қопқоғи билан уриб ўлдирган 63 ёшли аёлга суд ҳукми ўқилди. Бу ҳақда Жиноят ишлари бўйича Хонобод шаҳар суди хабар берди.
Аниқланишича, Андижон шаҳрида жойлашган Саховат кексалар ва ногиронлиги бўлган шахслар учун интернат уйида доимий яшовчи Жамила Қаюмов (барча исм-шарифлар ўзгартирилган) 2018 йилдан буён шаръий никоҳ асосида фуқаро иккинчи гуруҳ ногирони Умирбек Матисақов билан бирга яшаб келган. Жуфтлик 2019 йилнинг 1 декабрь куни биргаликда телевизор кўриб, спиртлик ичимлик ичган. Шунда Умирбек хотинига жинсий эҳтиёжини ғайритабиий усулда қондиришни таклиф қилган, Жамила эса рози бўлмаган. Натижада Умирбек уни мажбурламоқчи бўлганида жаҳли чиқиб, унитаз қопқоғи билан эрининг бошига бир неча марта уриб, унга тан жароҳати етказган.
«Ўша пайтда важоҳатда эдим. Унинг қилиғидан ғазабланганим учун ақлим жойида эмасди. Шу сабабли ҳозир нима билан урганлигимни эслай олмайман. Тўғри тушунасизлар деган умиддаман, мен ўзимни ҳимоя қилиш учун шундай қилганман. Ҳар қандай жазога тайёрман, қилмишимдан афсусланмайман», — дейди судланувчи.
Судда Жамила Қаюмова Жиноят кодексининг 104-моддаси 3-қисмининг «д» (қасддан баданга оғир шикаст етказиш жабрланувчининг ўлишига сабаб бўлиши) банди билан айбли деб топилиб, унга нисбатан Жиноят кодексининг 57-моддаси қўлланиб, 4 йил муддатга озодликдан маҳрум қилиш жазоси тайинланган.
