Водилдаги “Чинор таги” истироҳат боғи тўлиқ реконструкция қилинади
Фарғона тумани Водил ҳудудида жойлашган “Чинор таги” истироҳат боғини кўздан кечирган вилоят ҳокими Хайрулло Бозоров, боғни тўлиқ реконструкция қилиш бўйича топшириқ берди.
Туман секторлари раҳбарлари билан ўзининг кўркам ва салқинлиги билан ажралиб турадиган мазкур боғ ҳудудини кўздан кечирган вилоят ҳокимига, бу ердаги Ислом оламининг улуғ мутасаввиф донишмандлари орасида ўзига хос мўътабар ўрин тутган Хожа Аҳмад Валийнинг мақбараси ҳамда ҳудуддаги минг йиллик азим чинор ҳақида маълумот берилди.
Боғнинг қаровсиз ҳолати, эскирган атракционлар ҳамда оилавий ҳордиқ чиқариш учун мўлжалланган бошқа объектлар, ёритиш тизимининг йўлга қўйилмаганлиги вилоят раҳбари томонидан танқид қилинди.
Хайрулло Бозоров, “Чинор таги” истироҳат боғининг топографик съемкасини ўтказиш ҳамда тўлиқ реконструкция ишларини амалга ошириш учун боғнинг янги лойиҳасини жадал суръатларда тайёрлаш бўйича топшириқ берди. Истироҳат боғида реконструкция ишлари бу йилги мавсумнинг якунланиши билан бошланиши ҳамда келгуси боғ мавсумига қадар якунланиши белгилаб берилди.
