Сергелида 32,5 минг долларни ўзлаштириб юборган банк кассири ва бош мутахассисига жиноят иши қўзғатилди
Тошкент шаҳридаги банклардан бирининг валюта айрибошлаш шохобчасидан 32,5 минг долларни ўзлаштирган банк назоратчи-кассирининг кирдикорлари фош бўлди, деб хабар беради Бош прокуратура ҳузуридаги департамент.
Маълум қилинишича, департаментнинг Сергели туман бўлими томонидан «Ўзсаноатқурилишбанк» АТБнинг мурожаатига асосан терговга қадар текширув ўтказилган. Текширув давомида банкнинг Сергели филиали қошидаги «Ўзгариш банк хизматлари маркази» назоратчи-кассири Ю.Н. ва бош мутахассиси М.Ш. 14—17 июль кунлари марказнинг валюта айрибошлаш шохобчасидан ўзларига ишониб топширилган 32,5 минг долларни олишга эришиб, ўзлаштириш йўли билан талон-торож қилгани аниқланган.
Шунингдек, Ю.Н. ўзлаштирган маблағларининг бир қисмини Lacetti русумли автотранспорт воситасини сотиб олиш ҳамда яшаш хонадонини таъмирлаш ишларига сарфлаб, жиноий фаолиятдан олинган даромадларини легаллаштирган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 243-моддаси (жиноий фаолиятдан олинган даромадларни легаллаштириш) билан жиноят иши қўзғатилиб, тергов ҳаракатлари ўтказилмоқда.
Аввалроқ Арнасой тумани ҳокимлиги мансабдорлари 7 млрд сўмни ўзлаштиришда гумонланаётгани, тадбиркорларга 903 млн сўмлик нореал қарздорлик ҳисоблаган «Ҳудудгаз Жиззах» ходимларига нисбатан жиноий иши қўзғатилгани, Ўзбекистон Экология қўмитаси ва унинг таркибидаги ташкилотлар 9,4 млрд сўмлик маблағни ноқонуний сарфлагани тўғрисида хабар берилганди.
